Chronik des Vereinsjahres 2024 vom Friahjahr bis zum Winter——————————————
Am 23.Februar 2024 is unser zweit-ältestes weibliches Mitglied, de Barbara Strauch nach 43
Mitgliedsjahren im Alter von 93 Jahr verstorben. Danke fia de lange Vereinstreue und Ruhe in
Frieden.
Zur Frühjahrsversammlung am 13. April, hod unser Verein eiglon und Desmoi a Hauffa Ehrungen
zu verkünden ghabt.
Unsere Aktiven und de Jugendgruppen san stark vertreten gwen und ham uns zu da Musi vo da
Johanna und am Thomas Spitzl und am Woidleitner Ludwig aufdanzt.
Mit am Griass God und dem Gedenken für Unsere verstorbenen Mitglieder hod Unser Vorstand de
Versammlung im Saal vom Kriechbaumer in Miadakin eröffnet. Namenstage san vom Stacheder
Max, Unserm 2. Vorstand gratuliert worn.
De Chronik is vo da Funk Beawi, und da Kassenbericht vo Unserm Kassier, am Stacheder Bädal
vorgelesen worn, der in dem Zuge vom Revisorbericht einstimmig entlastet worn is.
Da Woidleitern Ludwig hod zum doa ghabt, zwischen Musi Spuin und Hornfuchspflicht keinen
Krug trocken und kein Ohr Basslos sei zum lossen.
Sei Hornfuchsbericht hod unentwegtes Füllen unseres Riahkibes zur Folge ghabt. Bravo!
Da Weigl Christian hod sie bei einigen Mitgliedern fia 25 bzw. 40 Jahren Mitgliedschaft, namentlich
bedankt:
Leni Kunert (25), Irmi Erlinghagen (25), Andrea Höbel (25), Barbara Kuchler (25), Stefan Walz (25)
, Paul Siersch (25), Barbara Walz (40), Gottfried Rinser (25), Maria Spiel (25), Andreas Stockinger
(40), Barbara Merk (40), Albert Mayer (40).
Zusätzlich ham ma fia langjährige Dienste Fian Verein 2 neie Ehrenmitglieder und an neien
Ehrenvorstand beglückwünschen deaffa:
Stockinger Peter: Ehrenmitglied
2. Vorplattler 1980-1984; Beisitzer 1984-1986 und 2000-2004; 1. Jugendleiter 1986-1994; 2.
Jugendleiter 1994-1996
Weigl Hildegard: Ehrenmitglied
Dirndlvertreterin 1982-1984 und 1986-1988; Schriftführerin 1982 - 1986; Fahnenbraut 1984;
Rückhalt als Frau des Vorstands; Osterkerzenbasteln...
Weigl Hubert: Ehrenvorstand
1. Vorplattler 1980-1988; Revisor 1984-1986 und 1992-2000; Beisitzer 1988-1992;
Kindergruppenbetreuer 1995-1999; Festausschuss Gaufest 1999 und 2004; 1. Vorstand 2000-
2014; Revisor im Inngau
Da Weigl Hubert hod si noch seiner Ehrung no mid a bar dankenden Wortn andn Verein gricht,
das er hofft, dass unser jetziger Vorstand weiterhin so unterstützt wird, wie er unterstützt worden
ist.
Unsere aktiven haben mit 13 Paar, den zwei Steirer zum Besten gegeben, wos durch a edle
Spende vo Bier, Schnaps und Greichats belohnt worn is.
Bei Musi und Plattler is der Obend gmiatlich ausgeklungen.
Zum Kleidertausch fia Unsere junga Trachtler war wieder a großer Andrang und so san olle fia des
kommende Jahr fesch ausgestattet worn.
Zum 18ner Bittgang noch Kloahearoa ham sie um de 100 Trachtlerinna und Trachtler mid eanane
18 Vereine aufgmachd, de gemeinsam an Rosenkranz bett und bei scheenstem Weda de Messe
unter freiem Himmel mit Kaplan Baltaraju Banda zu Klängen der Hearoana Musi feiern ham kinna.
A Dank guid de Trachtenvereine vo Großhearoa und Kirchdorf Dias organisieren und Dekorieren
und olle Unsere Trachtler de fia Unsern Verein mid ausgrukkt san.
Zum Maibamaufstein in Miadakin ham Unsere Aktiven Burschen, De Männer vom Stopselclub und
vom Dirndl und Buschenverein olles gem, dass den Bam mid geballter Kraft ind Heh brochd ham.
Seit Ostern is da, vo da Stodt gespendete Bam beim Gmoaheisl im Zelt gleng.
Der Bama is 32m hoch und über 2 Tonen schwar. 26 Kinder vom Dorf ham zu Pinsel und Farb
gegrifffen und den Bam grundieren deaffa. Trotz mehrerer Versuche, is der Maibam ned geklaut
worn und hod mid Unterstützung vo da Feierwehr an seim Plotz beim Kriechbaumer Wirt aufgsteid
wern kinna. Unsere 2 Kindergruppen san fia de über 1000 Besucher auftreten und d Derder Musi
hod a scheene Musi gmachd, de in da gemeinsamen Bayernhymne sein Höhepunkt gfundn hod.
Am 3. Mai hod Unser Maiandacht in da Maria Himmefahrtskirch mim Pfarrer Kielbassa stattfinden
kinna. De Hundhammer Anna hod auf da Harfen gspuid und de Theres Weigl, de Strauß Marianne
und Rinser Christine ham mid Querflöten und Gitarren an Kinderchor begleitet. Da Resch Martin
hod Orgel gspuid und zu de Fürbitten vo Unsere Jugen Trachtler is de Marienfigur in da Mitten mid
bunte Blumen geschmückt worn. De Weigl Sophia, de Anna Gartmeier und de Zita Marcon ham
midnand auf da Flöten aufgspuid und san dazua vo da Ableitner Eva und da Zweckstätter Doris
begleitet worn. Im letzen Liad mid Orgel, da Marcon Elfi an da Geigen und am Stacheder Quirin
am Bariton ham olle um den Segen vo unserer Gottesmutter gebeten. Danoch hods fia olle Kinder
wia immer a Kugel Eis beim Toscani gem!
Unser Herbergsmuada Und Wirtin vom Kriechbaumerwirt, de Irmgard Kriechbaumer hod Ihran
letzten Erdenweg beschritten und hod do, noch 48 Jahren Vereinstreue a Geleit vo Unserer Fahna
ghabt. Seit 1983 hod Sie uns willlkommen ghoassn und verpflegt und is 2009 zum Ehrenmitglied
vo Uns Edelweißer ernannt worn. Der Herrgott schenk Dir seinen ewigen Frieden und danke fia
olles!
Am Muttertag hod heia erstmalig a „Frühschoppen im Brunnenhof“ stattgfundn. Fia jede Dame a
rote Rose, boarisch gmiatlich bei scheena Weda hod de Drillinger Musi aufgspuid. De Zwoa
Dirigenten, da Mayer Andreas (Kottä) und da Merk Roland ham gemeinsam durchs Programm
gführt und Unsere und de Oberlandler Plattlergruppn san auftretn. Unser neia Kurhauswirt hod de
Verpflegung guad gemeistert und d Ambosboika war a berriger Abschluss!
Zum Volksfestaufmarsch in Oabling san heia as erste moi Trachtlerinna und Trachtler vo de
Edelweißer aufmarschiert, und ham Unsern Verein guad vertreten.
Um de 20 Frauen vo Unserm Verein ham Sie an zwoa Abenden unter da Leitung vo da Merk
Beawe droffa um Drahhosen, Unterröcke, Schmieße und Reck gnaht, damit unsere feschen junga
Trachtlerinna sauba daherkemma kinan. Es san in dem Zuge a Unsere 11 neien Miadadirndl vo da
Jugendgrppn fertig eigwandt worn.
Am 18. Mai hod Unser Ehrenmitglied, de Gartmeier Annemi Ihran 80. Geburtstag beim Wirt vo
Dred gfeiert, wo ma Ihra mid am Geschenkkorb und Unserm Vereinsliad gratuliern ham kinna. War
a richtig berriger Trachtlerchor beinand. No lange gsunde Jahr und weiterhin fui Freid an Unserm
Verein!
Unser große Kindergruppen hod an Hüttenausflug fias midananda gmachd. Danke de Betreuer
fias organisieren und Zeit nehma, dasss Unsere Junga so scheene Erlebnisse mim
Trachtenverein hom kinnan.
Zum Feierwehrfest in Ellmosen ham ma mid da Fahnaabordnung mid ausrucka deaffa.
An Fronleichnam war a scheens Weda und mia san noch da Messe im Brunnenhof am Kurhaus
an Marienplatz und anschließend in Unser Pfarrkirch ganga wo uns der Segen vom Pfarrer
Kielbassa entlassen hod. Noch´m Weisswurschtfrühstück im Johannisbod is des traditionelle
Fuassboispuih vo de Ledigen und de Verheirateten im Jahnstadion opfiffa worn. Nochdem de
Verheirateten 2:1 gwunna ham, is mid Kuacha, Kaffee und Eis der Feierdog no ausklunga worn.
Unser Verein trauert um Unser aktives Mitglied, de Marianne Kriechbaumer, de am 29. Mai 2024
von uns ganga is. Mit nur 70 Jahr hod Sie Unser Herrgott zu sich ghoid. Ois Dirndlvertreterin hod
Sie 4 Jahr de Aktiven und mid ihrane kuchenspenden ollerweil Unsern Verein unterstützt.
Zum Bezirksmusifest in Schenau han mia zu am berrigen Fest foia Musi eiglon worn. Schee dass
ma dabei sei ham deaffa!
Am 16. Juni ham ma am Vereinsabend a Neuaufnahme ghabt. Mia deaffan an Weigl Christoph
ganz herzlich bei de Edelweißer willlkommen hoassn!
Ende Juni war wieder Irlachweiherfest! So fui Besucher und herrlichstes Weda ham den Kurpark
zu den Klängen der Drillinger Musi in a wunderbare Atmosphäre daucht. Fui Oablinga Vereine
ham de Leid verköstigt, so wia mia vo Kuchenbar bis Grillfeischstand und da Spülbar fleissig warn.
De Gruppen vo de 2 Oablinger Trachtenvereine ham sauba aufdanzt und Unsere Aktiven ham an
Steira zum Besten gem. Es is schee dass sie des Fest so großer Beliebtheit erfreut und dass a
des planen dun auf - und obbaun oiwei so guad hihaud! Danke olle helfenden Hände!
Des 1. Wochenende im Juli ham Unsere Jugendleiter a Zeltlager in Chieming auf de Haxn gsteid.
Danke fia de Organisation das Unser starke Jugend so an guadn Zammahoid und Gaude an da
Freid firanand kennalerna deaf.
Nochm Gauheimatabend am 12. Juli ham ma am Sonntag Unser Aller Gaufest in Altenbeuer
feiern deaffa. Mia warn stark vertreten und de Dreder Musi hod uns musikalisch begleitet. Da
Inngau hod a berrigs Fest ghabt und mia gfrein uns scho weil ma heia auf a zwoats Gaufest geh
ham deaffa, fia des mia heia ausnahmsweise as Gaupreisplatteln ausfoin ham lossn.
Zum Gaufest in Westerham vom Gauverband 1 warn a de 18ner Trachtenvereine vom
Oidlandkreis Oabling glon. A so a großes Gaufest kennan mia so ned und es war a große Ehre
das ma mid eiglon warn. Da Vorstand vo de Westerhammer hod zu dem Dank dass Sie de 18ner
a eiglon ham bloß gmoand, dass auf de Leid jetzt a nimma drauf zamm kimmt, weil scho sooo fui
san, und sie Uns olle gern dabei ham. Dankscheen!
De Edelweißer ham fias Kinderferienprogramm vo Oabling wieder des Kegeln im Kurhaus
organisiert. De Stockinger Franziska ois Jugendleiterin, da Nitsch Jakob und da Martin Beni ham
mid de 20 Kinder an berrigen Nammedog verbrochd. Getränke fia de Kinder hod da Verein und de
Kegelbahn da Stefan Linnerer, unser Kurhauswirt kostenlos zur Verfügung gsteid. Danke dafia!
De Theaterfahrt noch Flintsbach hod heia wieda de Stacheder Moni organisiert. Danke dafia.
Am 18. August is Unser alljährliche Gauwallfahrt an´d Schwarzlack ausgfoin, wegam weda und
der gottesdienst war in dabrannaburger kirch und is a ohne fahnenabordnungen gwen.
Unsere Ehrenmitglieder, de Rosa und da Franz Rottmüller ham dankbar auf 50 Jahr gemeinsame
Ehe zruckblicka deaffa, und eanane Goldene Hochzeit feiern. Aufwecka in da Friah, Kirch und a
scheene Feier beim Wirt in Ellmosen, wo mia mid de Aktiven an Ehrdanz gmachd ham. A
Gratulation vo Unserm Vorstand, am Weigl Christian und as Feiern mim Verein und da ganzen
Familie war uns a große Ehre. Mia dankan eich fia olles, und wünschen no fui scheene
gemeinsame Jahr!
Da Blosmusiabend am mittleren Sonntag vom Rosenheimer Herbstfest hod fia Uns an reservierte
Tisch, a guads Bier, Essn, Goasslschnoiza und d Ambosboika, sowia a scheene boarische
Umrahmung mid da Dreder Musi geboten. Da Dirigent vo der uns so oft begleitenden Musi, da
Merk Roland, is heia fia 35 Jahr Musimoasda auf’n Rosenheimer Hrbstfest geehrt worn.
Seit lange Jahr scho war wieder der gemeinsame Trachtenjahrdog vo de Edelweißer und de
Oberlandler. D´Willinger Musi hod Uns vom Heimathaus zur Maria Himmefahrtskirch gspuid und
do den Gottesdienst vom Pfarrer Kielbassa fia de fuin Trachtler und Gläubigen gestaltet. Fest
midgsunga is worn und nochm zruckmarschieren hod sie Jeder sei Middogessn beim Wirt vo
Miadakin zu da Musi vo de Willinger schmecka lossn.
!An dem gleichen 29.september war a de erste Hirtabuaprob fias Oablinga Adventssinga, des vo
unsere Trachtlerkinder mitgestaltet und vo da Merk Beawe organisiert wird.!
Zwischen 5 und 6 Musikannten ham bei Unserm letzten Vereinsabend im Jahr im Soi beim
Kriechbaumer in Miadakin am 6.oktober aufgspuid. Fui bestehende und zukünftige Mitglieder san
kemma, und nochdem olle Namenstagskinder vom Stacheder Max gratuliert worn is, ham ma no
den 65. Geburtstag vo Unserm Ehrenmitglied, da Weigl Hildegard und Unserm Ehrenvorstand und
Ihram Mo am Hubert besingen deaffa. Zur goldene Hochzeit vo da Rosa und am Franz Rottmüller
is a nummoi gratuliert worn und da Woidleitner Ludwig, Unser Hornfuchs hod Sie über de großen
Spenden an „Riahkibe Kuahwarme Goassmille“ sowia de Spenden and´n Verein gfreid. Mit dem
Einstieg vo da neien Kindergruppen, de in dem Jahr unter der Obhut vom Christian Niedermaier,
da Irmi Erlinghagen, da Kunert Leni, und da Franziska Gartner steht, ham mia Uns über fui
Neuaufnahmen vo de Eltern der Kinder gfrein deaffa. Des warn de Hedwig Voggenauer, de Heidi
Zehetmaier, de Wierer Stephanie und da Wierer Thomas, da Richard Landkammer, de Ursula
Pahls, de Ricarda Weber, de Sabrina Fabian, da Matthias Sedlmeier-Fabian, da Hans Krabichler
und ois Mitglieder vo Unsere Aktiven gfrein mia uns a über de Aufnahme vom Weigl Simon und da
Gartner Franziska. Plattlt is no worn und de Jugendgruppen hod an Figurendanz aufgführt, bis der
Obnd an gmiatlichen Ausklang gfundn hod.
Am 7. Oktober hod unserer aktives Mitglied, da Franz Kriechbaumer ruhig eischlaffa deaffa. Vielen
Dank dass du Uns so fui Jahr so a Guada Wirt vo Miadakin warst. Mia gfrein uns fia di, dass du
jetzt mid deiner Frau bei Unserm Herrgott de scheenste Hoamat finden hosd deaffa. Ruhet in
Frieden.
Am zwoatn Wochenende im Oktober war da alljährliche Vereinsausflug, den de Moni oiwei so
berrig gestaltet. Vollgeladen mid Trachtlern, Musi und Essn is da Bus bei schlechtem Weda
aufgebrochen und bei Guadn angekommen. Ziel der Reise: Lienz!
De Aktiven ham de Fahrt mid eanana Witzeeinlage und da Proviantversorung kurzweilig und lustig
gmachd. A oide Römerstadt und da historische Lokomotive san besichtigt worn und es is wia
immer fleißig danzt und Gaude ghabt worn! Vielen Dank fia olle de midgfahrn san und de olles mid
organisiert und ermöglicht ham!
Liebe Aktive, de Busfahrt is sooooo lang und i hoff das nia mehr moi Oana, vo de armen
Daheimgebliebenen, auf de schriftlich festghoidne Gaude vom Bericht fürn Vereinsausflug muas!
Oiso Bitte! Schreibz, dass im Herzen zum dabei sei is!
Am 15. Oktober san de Musikkorps fia de schenauer trachtler auftreten und Mia ham ois Verein a
Spende fia Unser Jugendarbeit griagt. Vielen dank dafia!
De Gauherbstversammlung hod heia wieda am Happinger Hof stattgfundn.
Zum 18ner Kirta beim Wirt vo Midakin san Unsere Aktiven ausgruckt und han mid de neien leibe
und Schirzl auf unser Vereinsgwand fesch beinand gwen Sie ham danzt wia da Lump am stecka.
Heia war beim Gaujugendpreisplatteln mid Wertung fia de Dirndl.
4 Mädels vo Unserer Kindergruppen ham middanzt und eana bests gem!
Zur Gaujugendwartinna-, und Jugendleiterversammlung is eiglon worn und unsere vertreter warn
a dabei.
An so traumhaft goldenen Herbst in de Berg, mid fast koam Reng, noch so am nossn summa, de
jetzt scho feichtn Abende, da Nebe, der Sie seitn Herbstfest nimma so recht verschliaffa mog. Es
is November.
Agratt am Leonhardidog, an dem bei uns in oberbayern so a feierdog is, is a rießen politischer
Umbruch bei Uns und auf da ganzen Welt gwen. Unser Ampelregierung steht bloẞ no auf rot-
grün, de Amerikaner ham an Neien oiden Präsidenten, beim Kriag in da Ukraine wern’s in 3 Monat
scho 3 Jahr wern, seitdems zum schäban ogfangt hod.
I wünsch Uns, dass ma ned gleichgültig wern, dass ma versuachan Unser bests zum gem, dass
ma de boarische Zufriedenheit in de Welt ausseschickan, und beten dass ma an Frieden und a
Vernunft finden auf dera Welt.
Gschriem von da Funk Beawi, in Woichnsee fia Ihran Verein in Oabling
Chronik des Vereinsjahres 2024/2025 der vordere Teil
(10.11.2024 Herbstversammlung 2024 mit Neuwahlen)
Am 10. November 2024 war unser Jahreshauptbersammlung beim Wirt
in Miadakin und Unser Vorstand, da Weigl Christian hod mit am
Grußwort de zahlreichen Mitglieder begrüßt und olle ham sie fia des
Gedenken an unsere verstorbenen Mitglieder erhoben.
Mehrere Gratulationen, sowia as 40-jährige Ehejubiläum vo Unserm
Ehrenmitglied am Stockinger Peter und seiner Margit san ausgsprocha
worn. Zudem deaff ma Unser neis Mitglied, de Verena Schlier herzlich in
Unserm Verein willkommen hoassn.
De Aktiven Buam ham eana neis „Aktivenleibe“ vorgsteid mid dem sie
sauba beinand mid unsere feschen Dirndl unsern Verein bei legerere
Anlässe vertreten kinnan.
De Ausschussmusi mid da Johanna Spitzl, am Georg und da Katharina
Gartmeier und am Woidleitner Ludwig ham den Obnd musikalisch
gestaltet.
De Chronik is vo da Funk Beawi, und da Kassenbericht vom Stacheder
Päda jun. vorglesn worn. Der letze Bericht unserer langjährigen
Jugendleiterin, da Stockinger Franziska, Unserer Mausi, hod zoagt, wia
engagiert de fünf Kinder- und Jugendgruppen übers Jahr vo Unsere
Jugendleiter gefördert wern.
Unser Zeigwartin, de Merk Beawe hod über de 11 nei eigwandtn
Miadadirndl verzeid, und d Spitzl Johanna, de seit 18 Jahr unser tüchtige
Musikwartin war, hod ihran Abschlussbericht mit dem Liad: „Boarisch
Musi macha“ abgeschossen. Ihra Papa, da Höbel Franz, Unser Metze,
hod mid seiner Tochter gemeinsam den Abschied eingereicht. Sei
Verdienst an Unserm Verein hod sie seit 2004 fia den Einsatz mid
unserer Internetseiten, und seit November 2014 ois Schriftführer
erstreckt. Da Franz hod mid seiner ersten und letzten Rede andn Verein
umrissen, wieche Projekte er obagt und wia fui Freude de Früchte seiner
Arbeit brochd ham. Unser erster Vorplattler, da Gartmeier Georg, hod
über de Aktiven berichtet und seinen Rücktritt vo seim Amt verkündet.
Mia mechtn uns ganz herzlich bei da Franziska Stockinger, da Johanna
Spitzl am Franz Höbel und am Georg Gartmeier, sowia da Bernadette
Hartmann ois ehemalige Dirndlvertreterin, bedanken fia eanane vielen
Projekte, Stunden und Middoa das Unser Verein so fui berrige Sachan
dalem hod kinna. Vo Zeltlager, bis Heid spuin mia , Unser Website und
den Zammadhoidtn vo de Aktiven meng ma vergeits god song, um nur
an kloana Auszug zu nennen. Großer Applaus is eana zuteil worn. Da
Gartmeier Lorenz steigt, mit Unterstützung vom Franz, in de Fußstapfen,
wos de Website betrifft.
Da Wahlausschuss fia de Neuwahlen is vo unserm Bürgermeister, am
Stephan Schlier, geleitet worn, und vom Nitsch Sven und am Gräf Michi
vervollständigt. Noch am prägnanten Wahlvorgang is de neie
Vorstandschaft verkündet worn:
Der 1. Vorstand Christian Weigl, sowie der 2. Vorstand Maximilian
Stacheder und der 1. Kassier Peter Stacheder jun. behalten ihre Ämter.
Marina Mayr löst Franz Höbel als Schriftführer ab. Georg Gartmeier gibt
das Amt des 1. Vorplattlers an Stefan Strauß jun. ab.
Im Ausschuss wurde der 2. Kassier Markus Martin, sowie die Chronistin
Barbara Funk, der 2. Vorplattler Kilian Nitsch, der Hornfuchs Ludwig
Waldleitner und unser Fähnrich Jakob Schwaiger, als auch die
Zeugwartin Bärbel Merk wieder gewählt. Als Dirndlvertreterin löst Lena
Nieder die bisherige Amtsinhaberin Bernadette Hartmann ab.
Als 1. Jugendleiterin dankte Franziska Stockinger nach 6 Jahren ab,
und Ida Baumann nahm das Amt an. Als 2. Jugendleiter bleibt Jakob
Nitsch, sowie Stephanie Gräf und Johannes Eichner als Beisitzer und
Andreas Acherer und Christina Nitsch als Revisoren auf Ihren Posten.
Der Vereinsmusiker Georg Baumann sen., der Brauchtumswart Hubert
weigl verlängern ihr Amt ebenfalls um zwei Jahre. Zusätzlich wurde Eva
Niedermeier als stellvertretende Dirndlvertreterin gewählt. Für das Amt
der Musikwartin konnte sich leider keine Nachfolge finden, somit
bleibt das Amt vorerst unbesetzt.
Nochdem de Wahl vom Schlier Stephan beschlossen worn is, hod uns
de Feierwehr Miadakin zu eanam 150-jährigen Gründungsfest, mid am
Kasten Bier und eanana Festschrift eiglon, und so is de Versammlung
gmiatlich ausklunga.
——-
Am 23. November 2024 hod Unser langjähriges Miadadirndl de
Baumann Anna Ihran Tobias Pabst geheiradt. De Anna war vo
November 2018 bis November 2022 Unser 2. Jugendleiterin und hod a
sunsd mid Musispuin und Hilfe bei da Organisation vo musikalische
Ereignisse unterstützt und middo. Schee das ma bei eich in da scheena
Kirch in Maria Himmefahrt dabei sei ham kenna und spada beim Wirt in
Holzham in da Mühle. Mia ham an Ehrdanz gmachd und da Christian
hod a Kreiz hergschenkt mid de besten Wünsche für eana gemeinsames
Lem und an kloana Anflug vo Wehmut, weil de zukünftige Wohnstätte vo
da Anna im Dachauer Land is. Olles Guade eich und Gottes Segen!
—-
Am (27.11.2024) letzen Mittwoch im November war da
Abschlussgottesdienst vo de Gruppen in Miadakin in da Kirch. Da
Stacheder Quirin am Bariton, de Theresa Weigl an da Querflöte und de
Marcon Zita an da Altflöte, Ihra Schwester, de Elfi an da Geige und d
Spitzl Johanna mid da Gitarre ham den Gottesdienst mit Rhythmuslieder
und Instrumentalstücken gestaltet. Danke da Johanna fias organisieren
und olle de dabei warn.
—
(28.11.2024) Ende November war a Ausschuss-kennalerna-
verabschiedungs-feier beim Wirt in Ellmosen. Da Oide und da Neie
Ausschuss warn midnand beim Essn, wos bei am berrigen Ratsch-
Abend de Wertschätzung fias Engagement im Verein zoagt hod.
—-
(28.11.2024) Am gleichen Dog war de Verabschiedung vom Pater
Athanasius ois Stadtkirchenpfarrer. Seitdem is da Pfarrer Kielbassa
eigsetzt und begleitet uns auf Unserm kirchlichen Weg.
Am 7. Dezember 2024 is unser Mitglied, da Georg Streicher verstorben.
Er hod a langs Leben ghabt und mia wünschen eam ewige Ruhe im
Himme drom.
—-
(8.12.24) Am 2. Sonntag im Dezember war as Adventssinga, des de
Merk Beawe wieda mid einige Edelweißer Trachtlerkinder - und
Erwachsene edelweisser Trachtler ois Schauspieler und Sänger
organisiert hod. Fast vo Olle Gruppen bis zu de Aktiven warn de
Mitwirkenden vertreten, und ham a so an besonderen verzaubernden
und besinnlichen Abend gestaltet. Danke olle fias middoa!
—
(14.12.2025) Am Samstag drauf war Unser Weihnachtsfeier beim Wirt in
Miadakin. Des Programm vom staadn Teil hod da Weigl Christian
zammgschriem und de Strauss Marianne hod mid de Kinder vo da neien
und älteren Kindergruppen a Nikolaus Liad eistudiert. De Rinser
Christina, de Martin Kerstin und de Wiegl Theresa ham fia musikalische
Begleitung gsorgt. De Hundhammer Anna hod uns a Stickl auf da
Harfen, sowia Familie Weigl midnand Musi gspuid. Mid am Bläserstück
ham da Merk Anian, da Strauss Valentin und da Nitsch Jakob den Abend
eingeleitet. Mia danken am Keller Toni, der an Nikolaus gmachd hod,
und olle seine fleißigen Schreiberengerl fias zuabadrong vo de nettn
Gschichten. Da Gartmeier Marinus hod de Regie vom Theater
übernomma, weil de Baumann Paula, durch des das sie a Baby erwartet
hod, ned kenna hod. Es warn 6 Schauspieler und d Moni ois Souffleuse
ois sie den Saal zu tosendem Applaus brocht ham bei dem Stickl: „Der
Erbfehler“. Des schwere Erbe der Männer bei den Wünschen der Frauen
einfach ned NA song zum kinna. Danoch war de Tombola wia immer a
gelungener Abschluss fia a gelungene Weihnachtsfeier. Mia mechtn uns
bei olle Gschäftsleid und Gönner unserer Tombola bedanken, bei olle de
organisiert, mit gmachd und kemma san.
—
Am 27.Dezember 2024 is Unser seit 1966 aktives Mitglied, da Erwin
Huber von uns gegangen. Lieber Erwin, Ruhe in Frieden.
—
(17.1.2025) Im Januar war de Nachfeier vom Irlachweiherfest im
Allegro. Mid de Oberlandler, na kloana Musi und am guadn Essn wars a
scheena Obend. Schee das de Midanand mid unserm Bruderverein so
harmonisch is!
—
Am 24.1..2025 ham de Oberlandler zum Ausschuss-Treffen mit Paten-
und Bruderverein eiglon. Im Gmoahof im Stüberl wars a netts
Zammkemma. Und er war einfach so, weils as scho oiwei moi macha
wuidn!
—
(31.1.) Ende Januar war 18ner Trachtler Treffen ois Stammtisch beim
Wirt in Miadakin des da Weigl Hubert oiwei Federführend organisiert.
Zwoa Wochan spada war no 18ner Versammlung, wo ma a vertreten
warn.
—
Zu am gmiatlichen Vereinsabend am 15. Februar 2025 ham ma Uns in
da Weinstum beim Wirt vo Miadakin troffa. Wia immer war der
besondere Höhepunkt vo dem nettn Obend im Friahjahr as Bayernrätsel
vom Matschgo, Unserm Markus Martin, des er eigens für seine
Edelweißer jeds Jahr anfertigt.
Desmoi iss um Brauchtum im Jahr ganga, und an 1. Platz hod noch na
Stichfrage de Schenkel Maria gwunna!
Da Stacheder Max hod de Namenstagskinder gratuliert, und da
Woidleitner Ludwig hod zum doa ghabt, Ziachspuin und
Riahkibeverteilen unter oan Huad zum bringa. Es is no gmiatlich zÉnd
ganga.
—-
Am 22. Februar 2025 is da oide Maibam vo Oabling umglegt worn, um
Platz fia den neien zum macha. Mia mechtn uns bei da M&M Zimmerei
aus Bruckmühl, da Oablinger Feuerwehr Und olle fleißigen
Trachtlerhände für´s Zammheiffa bedanken.
—
Unser Bundesrepublik hod vorgezogene Wahlen ghabt, weil de
Ampelregierung nimma den internen Rückhalt ghabt hod den Sie bruacht
häd. Scho in da Adventszeit hod da Wahlkampf ogfangt, wos in der eh
scho vollen, gschaftigen aber doch besinnlichen Zeit scho befremdlich
war. Am 23. Februar war dann de Wahl, und mit na Wahlbeteiligung vo
82,5 % auf dem höchsten Wert seit da Wiedervereinigung. Jetzt hoff ma
dass olle Parteien, de vo de Wähler eigsetzt worn san, Ihr Bestes geben,
in Gemeinschaft, Vernunft und Menschlichkeit. Die Spd hod des
schlechtasde Ergebnis seit 138 jahr ghabt und bildet aber trotzdem De
Regierung durch a kloane Koalition mid da Cdu/Csu. Sie wern
demnächst eigsetzt.
—
„Gsund san ma, und a Hochzeit ham ma!“ Am 28. Februar 2025 hod, wia
olle zwoi Jahr, wieder eine legendäre Faschingshochzeit in da
Raumstation beim Wirt vo Miadakin stattgfundn. Scho a hoibs Jahr
vorher san de Vorbereitungen oglaffa, und as Faschingskomitee hod
geschmiedet, und überlegt, und sich ideenreich in diesen „ruassigen
Freitag“ eingearbeitet. Der Beginn is des moi auf 7e vorverlegt worn,
wobei es do verschiedene Meinungen gem hod.
An der Jahreshauptversammlung wurde zur „Intergalaktischen
Faschingshochzeit“, nämlich zur Fusion der Milchstrassen, vom
Gartmeier Xav, alias Hochzeitslader, mit Blinklichter und Rakete
eingeladen. Von den Einladungskarten (handgearbeitet mit vielen
fleißigen Helfern), der Saaldeko mit Tischschmuck über die futuristischen
Throne bis hin zu phänomenalen Einlagen war es wieder ein gelungener
Faschingsball, bei dem die „Zimseer Musi“ für guade Stimmung gsorgt
hod.
Ois „Prinz Groovy, der Moonraker ober der Müllermilchstrasse von
Diskoferno“ hat Eva Niedermeier seine „Rakäthe, die heisse Venus von
der Büffelmilchstrasse“, verkörpert von Norbert Zakel, gheirat. Mid am
gekonnten und fetzigen Brautwoiza ham sa si in de Herzen der vielen
Ballbesucher danzt, so dass no a Zugabe erklatscht worn is. Mid fui
Herzbluad und fui Vorbereitung ham de zwoa Hochzeitsloda, da
Gartmeier Xav und da Rottmüller Hansi glänzend durch den glitzernden
Abend gführt. Es war, wia in na andan Welt zu landen, wenn ma in den
ausverkauften Saal eintrat. Fia de naxte Faschingshochzeit wern jetzt
schon wieda fleißig Ideen zammdrong---mia san gpannt und gfrein uns
scho! Danke an olle fleißigen Helfer, fia so a berrige Feier.
—
Mia ham an herrlich langa Fasching heia hom deaffa, mid fui
Veranstaltungen, wia z.b. da Bettelhochzeit in Emmering oder Berbling,
de ned jeds Jahr vorkemman. A langer Fasching hoasd aber a, dass des
wo nochm Fasching is, no gehäufter daher kimmt.
—-
So is unter anderem am 22.3.2025 da Kleidertausch Teil 1 fia de
Jungaktiven und de Jugendgruppen ogstandn an dem d Merk Beawe
mid da Rosalie fia a bassads Gwand gschaugt ham.
—-
(28.3.2025) Ende März war 18ner Jugendsingen- und musizieren, bei
dem des teilweis sehr hohe Niveu beeindruckt hod. Es war a scheena
Obend im Soi beim Wirt vo Dred.
——
(29.3.2025) Beim Kleidertausch Teil 2 is de Große und de Kloane
Kindergruppen, de im letzten Jahr Ihran Anfang gfundn hod, vo da Merk
Beawe und da Rosalie, da Nitsch Johanna und da Weigl Beawe
eigwandt worn.
Es is koa Selbstverständlichkeit, das es Tauschtage gibt, und es war
schee, wenn an dene Dog dann a olle de a andas Gwand brauchan,
kemma kanndn. Das de kleanan Gruppen a wieda a Auswahl ham und
das d Mama ned x- moi oanzln ans Gmoaheisl fahrn muas. Es is uns
wichtig das jeder unterstützt wird, der fia seine Kinder a Trachtlergwand
brauchd, aber de Arbad und Zeit, de dahinter steckt soiad gschatzt sei!
——-
Wia markant de Preissteigerungen im Laufe der Jahre verlaffa san, is
unter anderem am Kinderflam Aufgfoin, der vo 8 Mark auf 28 Euro
gstieng is, seit unser Zeigwartin, de Merk Beawe ihra Amt ausführt. Ned
nur des. Olles wird grod so fui deiriger es is erschreckend.
—-
(28. aufn 29.März 2025) Ende März is vo Freitag auf Samstag Unserm
Wachheisl vom Maibam a Besuch abgestattet worn. 4 Oberlandler wuidn
noch eanana Frühjahrsversammlung no ned hoamgeh und de fleißigen
Maibaumbewacher besuchen und mid eana a Bierle drinka. Sie wuidn
sie hoid bei da Wach unterstützen. Bam war do. Griffbereit quasi. Und
weil weder Bier no Wachleid do warn ham Unsere Oberlandler Freunde
Unsern Maibam oghengt und noch Berbling gfahrn. War ja direkt Frevel
gwen, wennsn ned midgnomma häddn.
Mit dem Schriftzug: „geht eich wos ob?“ hod da Christian in dera Nocht a
Buidl vo Unsere Diebe und Unserm Bam griagt und daraufhin appelliert,
den Wachplan zu bestücken.
—
Am 1.April.2025 warn dann Maibaumverhandlungen in Berbling. Ohne
Aprilscherz und mit Erfolg gekrönt is de Rückführung vo Unserm am
Thomas Dog gschlongna Bam erwirkt worn.
—-
(3.4.2025) Zwoa Dog spada erfolgte de Maibaumrückgabe zum
Wurmbauern in die heimischen Gefilde- Danke Lenz, fia de herberge fian
Maibam- An dem Dog wird er glei gschliffa und ghobelt und olle
bemühen sich um a bessere Wach!
—-
Am 6. April war Gaufrühjahrsversammlung, wo des neie jahr fia Unsern
Inngau eingeleitet worn is.
——
(11. April 2025) Legendär san Unsere Schoikweiba. Aktiv und bereit zur
Tat wachen Sie am Obend vom 11. April midnand auf unserm Maibam!
Bessere Verteidigung gibtz sicher ned. Weil sie do nur Wohlgesonnene
Gäste traun zu de 19 versammelten Schoikdamen hinzuzustoßen. Es
hod Pizza gem und Jedes Alter war vertreten. Der Bam is no do und de
tollkühnen Übernachtunsschoikfrauen sei herzlich gedankt!
—-
A de Aktiven machan a Maibamwach und geben Ihr Bestes, sowia olle
Freiwilligen, de Sie bisher und a weiterhin in de Wachliste eintragen
deaffan! Am Christian Danke fias organisieren und fias auffüllen der
Listenlücken!
(12.4.2025) Familie Halbig opfert sich und macht heid Maibamwach –
Einladung fia olle no noch da Frühjahrsversammlung zum Familienabend
in da Wachhüttn!
—
(12.4.2025 Frühjahrsversammlung)
Zum Schluss mecht i mi herzlich fia de Unterstützung bedanken, vo olle
de ma heiffa de Chronik zum schreim, weil i leida nimma so fui do sei
konn wia i gern dad. Mia san a berriger Verein bei dem sie fui riaht und
wo Sie Leid engagieren dass asso sei konn!
Im März wars zerschd soo schee und dann hods nummoi gschniem in de
Berg. Jetzt is April und mia gfrein uns über jeden Sonnenstrahl der
obakimmt. I wünsch uns olle an guadn Start ins neie Trachtenjahr!
Gschriem vo da Funk Beawi
Chronik des Vereinsjahres 2025 der hintere Teil
Frühjahrsversammlung 12.04.2025
Am 12. April 2025 hod Uns unser Vorstand mim Oid-Vädern Gruass: „Griass God“
zur Frühjahrsversammlung begriast. Beim Wirt in Miadakin ham mia uns Edelweißer
Trachtler zammgfundn und noch da Begrüßung is de Chronik verlesen worn. Mei
Mama, de Merk Beawi hod de Chronik fia mi (Funk Beawi) vordrong. A da
Kassenbericht vom 1. Kassier, am Stacheder Peter jun. und de Entlastung durch de
Revisoren is besprochen worn. Anschließend hod de gesammte Versammlung fia
Entlastung gstimmt.
De fuin Namenstage, runden Geburtstage und Nachwuchsglückwünsche, hod unser
2. Vorstand da Stacheder Max gratuliert. A deaff ma voller Stolz 2 neie Mitglieder im
Verein begriaßn. De Fischer Sarah und de Stahuber Klara. Schee, dass es eich an
dem Obend aufnehma habz lossn!
Danoch san no de Ehrungen fia 25-jährige Mitgliedschaft kemma, wo da Sibbers Uli,
da Schweiger Markus und de Nitsch Christina geehrt worn san. Fia 40-jährige
Vereinsträue san, de Hartmann Rosi, da Stacheder Bäda sen., de Stockinger Margit,
da Baumann Martin, da Krimplstötter Josef und de Weichinger Vorni mid ana
Ehrennadel besteckt worn. (Do warz ja a berriger Großer Hauffa)
D´Marianne Krimplstötter is fia 50 Jahr Mitgliedschaft bei uns Edelweißer genannt
worn. A besonderer Höhepunkt fia uns Trachtler, war de Ernennung, vo am neien
Ehrenmitglied, da Bine Siersch. Da 1. Vorstand, da Christian und da 2. Vorstand, da
Max ham sie feierlich in diesen ehrenhaften Stand gesprochen.
De Johanna und da Thomas Spitzl, sowia da Gartmeier Georg ham a scheene Musi
gmachd, und da Ludwig Woidleitner hod, trotz Verletzung, seinem Dienst ois
Hornfuchs in vollem Umfang nochkemma kinna.
Unsere Aktiven ham no an „Innsbrucker“ plattelt, bevor da Christian no, de
anstehenden Termine, verlesen hod. Er bedankt sie a bei olle Mitglieder und schließt
den Omd mid dem Spruch: „Sitt und Tracht der Alten, wollen wir erhalten, aber auf
dem alten Grund, wieterbaun zu jeder Stund!“. Und so wars no a gmiatlicher
Ausklang von na ereignissreichen Frühjahrsversammlung.
Osterkerzenbasteln 16.04.25
Schee langsam geht’s auf Ostern hi, und de Oablinger Trachtler ham wieder, wia jeds
Jahr zum Osterkerzenbasteln fia de Kinder eiglon. Um de 20 Dirndl und Buam, ham
unter der Anleitung vo da Weigl Hildegard, da Bossmann Edith und da Niedermeier
Eva wahre Kunstwerke gestaltet. Fasd 2 Stund lang san, mid Messer und Schar, de
Wachsplatten bearbeitet und so, scheene Ostersymbole auf de weißen Kerzen
entstanden. (Vo Blumen bis Kreuze, Lämmer, Feuerzungen und Sonnen war olles
dabei.)
Die fertigen Kerzen kemman an Ostern dann ins den „Osterkörberln“ und wern mit
den Speisen (Brot, Eier und Fleisch) gesegnet. So konn jeder des Osterfeuer mid
hoam nehma und des Osterliacht a seiba entzünden.
Trachtenwartversammlung und Kranzbinden am 26.04.2025
Am 26. April 2025 war Trachtenwartversammlung im nei renovierten Trachtensaal in
Bruckmuih, wo de Merk Beawe fia unsern Verein teilgnomma hod.
Am gleichen Nammedog war no as Kranzbindn beim Ziaglerhof, fia unsern Maibam.
Olle warn fleissig am Werk, sodass unser Bam am 1. Mai schee und würdig
geschmückt is. Danke fia olle Fleißigen Hände, und fia des „zur Verfügung Stellen
von da Örtlichkeit“ bei de Gartmeiers! Danke!
18-ner Bittgang am 27.04.2025
A heia hod da Heharoana Trachtenverein wieder organisiert, wia de 18
Trachtenvereine zum Bittgang von Maxhofen noch Kloahearoah eiglon ham.
D´Heharoana Blosmusi hod uns gspuid und da Kaplan Banda hod de heilige Messe
ghoidn. A 3 Frauen aus Heharoa ham mid Gitarr und Gesang den Bittgang an
einzelnen Stationen vom Kreizweg begleitet. Es war a scheena Dog.
Maibaumaufstellen 01.05.2025
Bei traumhaftem Weda hod uns de Dreder Musi zum Maibamaufsteihn am
Brunnenhof vom Kurhaus aufgspuid. Unser Bam is vorher beim Hof vom
Wurmbauern gleng und do mecht ma uns nummoi Herzlich fia de Gastfreundschaft
fia Unsern Bam bedankten. De Oberlandler ham eines Abends Vereinsabend ghabt.
In guter Absicht wuidn da Stadler Andreas, da Huber Sepp, da Larisch Hartl und da
Koller Emanuel no auf a Bier vorbeischaun… und weil vo uns koana do war zum Bier
drinka hams kurzerhand unsern Bam grampfed. Und mia? Mia ham a kräftige
Unterstützung beim Maibamaufsteihn vo de Oberlandler und Berblinger ghabt. De
Fichten war 26 Meter hoch und is mit geballter Muskelkraft in Ihra Angel druckt worn.
Unter dem Gesang der Bayernhymne ham ma de boarische Fahne empor zong!
Unser Bam is heia vo unserm Ehrenvorstand, am Gartmeier Konrad, aus seim Woid
in Otterfing gstift worn. Dankscheen do dafia. Danoch no schee geschmückt mit dem
seiba bundna Kranz vo Unsere Damen des Vereins. Heia hod da Eichner Johannes
as erste Jahr de Leitung übers aufsteihn ghabt, wo eam da Woidleitner Alois, da Lui,
mid seina langjährigen Erfahrung unterstützt hod. Und olles is guad ganga mid oam „
Hau Ruck“ nochm andan, bis er noch 2 Stund om war, unser Bam. D´Feierwehr hod
mid da Drahloata de Zunftdaferl obrocht, de zuvor da Gartmeier Xav und de Merk
Beawe wieder nei grundiert, ogmoid und hergricht ham. Das sie wieder schee san,
fia de naxten Jahr, wenn sie unsere Stände in Oabling vertreten.
An hauffa Leid san kemma um sie des Schauspiel ozumschaung und sie san vo vo
Kuacha bis Lebakas, Kaspressknedl, Bron und vielem mehr versorgt worn. Da
Linnerer Stefan hod a Bar aufbaut ghabt, und vo Essen bis drinka und olles im
Spülmobil wieder obspian und bediena hod olles da Verein alloa gschmissn. Des war
da Wahnsinn! Es san no Bierbänke vom Kurhauswirt kostenlos ausgliecha worn um,
auf der Wiesen, zwischen Brunnenhof und Vogelvoliere a no zu bestuhlen, weil so a
großer Andrang war. Mia ham an dem Dog um de 2000 Essen und 20 Hektoliter Bier
verkaft und olle ham narresch guad zammghoiffa. De kloane Kindergruppe is zum 1.
Moi auftreten und a de andan Kinder- und Jugendgruppen ham uns sauba oan
aufdanzt und plattelt. Danoch is no felissig zammgrammt worn und es is no
zammghokt und gfeiert worn, das olles so guad glaffa is. Vergelt´s Gott an olle de
egal in weicha Form an dem Dog mid obaggt ham, es war a Schau!
Diamantene Hochzeit Franz-Xaver und Annemie Gartmeier 10. MAI 2025
A Diamanterne Hochzeit - 60 Jahre Ehe - gibt’s ned olle Dog. So ham da Gartmeier
Franz und sei Annemie Ihran Jubeltag im Kleinen Kreis mid eanana großen Familie
gfeiert. In da Sebastianikirch is vom Diakon Jakob Hartmann a Segensandacht
ghoidn worn, wo de Kinder und Enkelkinder gestaltet ham. Im Namen des Vereins
hod Unser 1. Vorstand, da Weigl Christian und Unser Kassier dem Jubelpaar am
Nammedog, bei eana dahoam aufn Ziaglerhof gratuliert. Schee wenn fasd de ganze
Familie Trachtler san, do hod unser Liad: „solang das Edelweiß“ richtig innbrünstig
do, ois es zu Ehren des Jubelpaares unserer Ehrenmitglieder ogstimmt worn is.
Freiwillige Feuerwehr-Fest Miadakin 150 Jahre Jubiläum 18.05.2025
In Miadakin, do wualets. As ganze Dorf is auf de Haxn und macht an Ort schee fia
ena 150-jähriges Jubiläum vo da Freiwilligen Feierwehr. Am Festsonntag san ma
eiglon und fest dabei ois fesche Ortsvertretung im Trachtengwand. Es war a berriger
Dog, mid Kirch auf da Wiesen zwischen Gmoaheisl und Kiamä-Hof, da Miadakiner
Kirchenchor und de Derder Musi ham den Gottesdienst würdevoll gestaltet unter der
Leitung vom Pfarrer Kielbassa. Des Fest is wunderbar zu Ende ganga. Vielen Dank
für die Einladung!
Maiandacht 23.05.2025
Ende Mai hod unser Maiandacht in da Mariä Himmelfahrtskirche unter der Leitung
vom Diakon Klaus Schießl stattgfundn.
Fia de musikalische gestaltung hod de Hundhammer Anna mid da Harfen und da
Kinderchor unter da Leitung vo ….. gsorgt. ….. hod den Chor musikalisch begleitet..
Danoch warn de Kinder wieder, wia jeds Jahr zum Eisessen zum Toscani eiglon.
Danke an olle Mitwirkenden.
Patentreffen 25.05.2025
Zum Patentreffen ham mia de Schenauer Trachtler ois unsern Patenverein ins
Stopslerzelt noch Miadakin eiglon. Weil as Weda ned recht schee war, war der
Gottesdienst in da Miadakiner Kirch, den de Schenauer Musi gestaltet hod.
As Essen, des vo da Metzgerei Gigglinger kocht worn is, is im vollbesetzten Zelt vo
unsere Aktiven austeilt worn. De Kuchenorganisatörin war de Nitsch Christina, wobei
vo beide Vereine Kuacha midbrochd worn san. Ois Brauer, seines Zeichens, hod da
Woidleitner Matthias an Ausschank gschmissn, wo er no viele fleissige Helfer ghabt
hod. Olle ham guad dazuado, und so ham ma Unser Verbindung mit unserm
Patenverein gestärkt und unser Dankbarkeit fia so a guads Verheitnis zoagt.
Agratt zu dera Zeit warn a bar Wochan vo soich am Sauweda dabei, dass ma meine
Schof direkt leid do ham zum nauslossn. Doch Regen bringt a bekanntlich Segen,
und es war danoch a so a bsundas scheena Sommer, dass a richtige Freid war. A
der goldene Herbst, der schee langsam scho de Wiesen ogfriern lossd in da Nocht is
wunderschee!
Suiberhochzeit Marianne und Stefan Strauß 02.06.2025
Zur Suiberhochzeit ham ma da Marianne und am Stefan Strauß a ois Verein
gratulieren deaffa! Olle Guade!
Volksfestaufmarsch 06.06.2025
Zum Aufmarsch vom Volksfest vo Oabling san heia Männer und Frauen vo de
Edelweißer ausgruckt. A Scheens Buidl hod des gem, und a da neie Festwirt Mörz
hod sei Sach guad gmachd. Leider gengan de Besucherzahlen auf de kloana
Volksfestl ummadum eher zrukk und, vorallem wars schee, das wenn a boarische
Musi spuid, des a unterstützt wird. Kunnz denn nix scheenas gem? Ois a scheene
Musi und a guads Essn und a Trinka mid liabe Leid um sie rum?
Geheimtraining Verheiratete 15.06.2025
Total geheim war wieder da Termin des Geheimtrainings der Verheirateten
Mannschaft vo unserm Verein in da Zeitung gstandn. Da jetzt lange Zeit de Ledigen
verloren ham, war des Training scheinbar immer sehr fruchtbar.
Fronleichnam 19.06.2025
De heilige Messe fia de Oablinger Fronleichnamsprozession hod wia immer im
Brunnenhof stattgefunden. Schee is immer des Buidl vo de hauffa Edelweißer und
Oablinger Trachtler- und wia sie a Jeder fesch macht fia so an scheena Feierdog. De
Prozession is übern Marienplatz zur Pfarrkirche Mariä Himmelfahrt ganga. A bar vo
de ehemaligen Ministranten vo Himmefahrt und jezige Aktiven Burschen ham am
Meßner, am Baumann Schorsch beim Richten und Organisieren der Altäre ghoiffa!
Berrig!
Danoch san ma traditionell ins Johannisbod zum Frühschoppen eikehrt. Noch dem
gmiatlichen Brotzeitmacha midanand, ham sie de Fußballbegeisterten aufgmacht um
im Jahnstadion eanane Favoriten ozumfeiern. Bei sauscheena Weda ham de
Ledigen noch hartem Kopf an Kopf Rennads an Sieg fia sie entscheiden kinna. Sie
ham 3 zu 2 gwunna. ???
Bei Kaffee und Eiskaffe und Kuacha und Eis …. Es is ja scho immer Wahnsinn wia
aus dem Nichts in kürzester Zeit des berrigste Buffet entsteht, wenn olle
zammheiffan…. Ham mas uns dann richtig guad geh lossn und da oa oder andere
hod sie no unter dem Sprenkler vo da Rasenfläche gsteid, und seine müden Haxen
abgekühlt.
Vereinsabend in Ellmosen 22.06.2025
Am Sonntag noch Fronleichnam war a Vereinsabendpremiere. Unser Edelweißer
Obend hod beim Wirt in Ellmosen stattgfundn. Familie Spitzl hod uns aufgspuid und
mia ham de Rottmüller Anja, de Gartmeier Moni, de Baumann Vroni (geb. Sixt) und
an Andraschko Roman aufnehma deaffa. Es war a berriger Obend, es hod olles guad
funktioniert und de Fensterscheim beim Wirt vo Ellmosen ham a an Test bestanden
und san drin bliem, wia olle vereint as Edelweißer Vereinsliad gsunga ham.
Festabend und Battalionsfest der Gebirgsschützenkompanie Bad Aibling
28.06.2025 -29.06.2025
A in Oalbing hods heia a großes Fest gem, und zwar hod de
Gebirgsschützenkompanie Bad Aibling am 29. Juni as Battalionsfest ausrichten
deaffa. Am Festabend, am Samstag davor, san de Oberlandler und mia Edelweißer
auftreten und de Derder ham berrig aufgspuid. Am Sonntag dann war da
Festsonntag wo Unsere Oablinger Schützen mid eanane zahlreichen Gäste bei
wunderbarem Weda eanan Festgottesdienst am Pranzeck feiern ham kinna. A
würdevoller und scheena Umzug durch Oabling hod de Schützen zurückbegleitet zur
Viehhalle. Eanam Feierort. Unsere Trachtlerbuam ham an dem Dog fleissig beim
Essen ausdrong ghoiffa. Es war a berrigs Fest!
Irlachweiherfest 04.07.2025
Bei scheensten Weda ham heia wieder mehra Leid wia letzts Jahr den Weg zum
Irlachweiher gfundn, um mid de zwoa Oablinger Trachtenvereine an scheena Obend
zum verbringa. A neie Position vo da Schenk hod uns ghoiffa no mehra Platz fia de
Gäste zum schaffa. Aufgspuid hod wieder de „Drillinger“ Musi und dazua san de
Kinder-und Jugendgruppen vo de Oberlandler und uns Edelweißer auftreten. Heia
war de Zeiteinteilung a nei, weil de letzten Auftritte um 8e gar warn, und danoch zu
dera wunderbaren boarischen Musi d Leid no sauba aufdanzt ham. Es is so schee,
dass der gmiatliche Abend mid Belchmusi und Danz so geschätzt wird vo de Leid,
unter dem ganzen modernen Feste, de sunsd no olle angeboten wern.
Gauheimatabend 11.07.2025
Da Trachtenverein GTEV d ´Suizbergler Brannenburg ham sie noch langem suchen
im Gau bereit erklärt, as Gaufest auszumrichten, und am 11.07.25 war da
Gauheimatabend. Froh san ma, dass ma no wen gfundn ham, weil ohne Gaufest war
de Welt a ned so schee!
Gaufest GTEV d ´Suizbergler Brannenburg 13.07.2025
Am Sonntag war dann as Gaufest bei de Suizbergler in Brannerburg. Es war warm
aber bewölkt, und während da Aufstellung zum Festzug hod da Himme ausgschaud,
ois dad d Weid untergeh. Doch wenn de Trachtler feiern dean dann lachan d Engerl
und de Sunn is aussakemma. Da Wind hod des ganze Schlechte Weda ans Inndoi
ummedrong und mia ham bei Sonnenschein unsern Festzug genießen kenna. D
Kirch war in am großen Obstgarten und unsere zahlreichen Aktiven ham an
berriegen Ehrtanz in dem scheena Festzelt gmacht. Mia warn wia imma sau fesch!
Des Zelt hod noch hinten so an sakrischen Hang vo über 3 m noch unten ghabt,
dass de hintern Trachtler blos no d Kepf auf da Bühne gseing ham. Es hod scheinbar
koan „grodern“ Fleck in Brannaburg gem, wo 5000 Leid dann Platz ghabt hätten. Des
Fest is berrig ausklunga, nur schod war, dass nimma so fui danzt worn is wia sunsd.
Bruckmühler Volksfest - Tag der Tracht 14.07.2025
As Bruckmuiher Volksfest hod wieder, zum alljährlichen „Tag der Tracht“ eiglon. Vom
Trachtenverband gibz an festen Tag der Tracht, wo ma oghoidn werd, de Tracht a
indn Alltag zum bringa. As Volksfest greift des auf und lodt speziell de Trachtler aus
da Umgebung dazua ei! Berrig!
Peter Enzinger + 17.07.2025
Am 17. Juli 2025, direkt an seinem 99. Geburstag, is da Enzinger Bäda von uns
ganga. Er war 50 Jahre lang im Verein ois passives Miglied. Der Herrgott schenke
ihm die ewige Ruhe. Am Obend davor warn seine Freind no auf Besuch im
Krankenhaus und ham mid eam midnand Weißwirscht gessn. Es warn an Hauffa
Leid an seina Beerdigung, weil da Bäda a so geselliger und netter Mensch war. Ois
leztes verstorbenes Gründungsmitglied der Derder Musi war a a große schar an
Musiker do, de eam ois Abschied sei Lieblingsliad gspuid ham. Oh du mei
Wendlstoa, mei Herz ghead dia alloa. Mim Enzinger Bäda is a da letzte Veterana vo
Ellmosen beerdigt worn, der no im Kriag war, und so is a as letzte moi am Ellmosner
Friedhof beim Liad vom guten Kameraden gschossn worn. Unser Fahn hod eam auf
seim Letzten Weg begleitet. Lieber Bäda, ruhe in Frieden.
Gaupreisplatteln in Brannenburg 19.07.2025
Zum Gaupreisplatteln san 6 Burschen ois Einzelteilnehmer und Oa Gruppen vo uns a
wieder noch Brannenburg gfahrn. Voller Stolz is verkündet worn: Mia san vor de
Schenauer. Somit warn olle glücklich und es war no a gmiatlicher Ausklang.
Theater Flintsbach 05.08.2025
As Theater Flintsbach hod heia auf 350 Jahr Theatergeschichte zurückblicken kinna.
Zu dem Jubiläum is des Stickal: Madame Bäuerin gspuid worn und de Edelweißer
Trachtler san wieder mid am Bus midnand higfahrn. Dankscheen da Stacheder Moni
fias organisieren, und hoff ma, dass no fui Jahr so weidageht mid dem berrigen
Theater in Flintsboch.
Theater Neubeuern
A in Neubeuern hams heia a bsundas Stickal aufgführt. An Boarischen Jedermann
der mit über 100 mitwirkenden a Augenschmaus mid fui Trachtengwand zum seing
war. Er wird ned oft aufgführt und war a bsundas Ereignis in unserm Gei.
Ferienprogramm Kegeln 08.08.2025
Zum kostenlosen Ferienprogramm hod Unser Trachtenverein a heia wieder zu da
Kegelbahn im Kurhaus eiglon. Mid maximaler Anmeldezahl der Kinder ham sie da
Nitsch Jakob und da Eichner Johannes guad gschlong und zwischendurch hods no
gesponserte Getränke vo da Aibkur gem. Es soiad mehra kostenlose
Ferienprogramme gem, weiche de Eltern entlasten und de Kinder erfreuen, weil as
Lem einfach immer deiriger werd.
Gauwallfahrt Schwarzlack 17.08.2025
Wia immer war bei da Gauwallfahrt an´d Schwarzlack scheens Weda und de
Trachtler ham an scheena Dog ghabt.
70. Geburtstag Prinz von Lobkowitz in Maxlrain 23.08.2025
Zum 70. Geburtstag hod da Prinz von Lobkowitz in Maxlrain alle umliegenden
Vereine mit Fahnenabordnung und Vorstand eiglon. Es war a große Ehre und
würdevolle Festlichkeiten. Und! Vorsicht! Geschichtsträchtig! Unser Fähnrich da
Schweiger Jakob hod erstmalig neba am Fahnenbegleiter, am Hundhammer Andreas
a a Fahnenbegleiterin dabei ghabt. Sauba Beinand mim Miada hod de Weigl
Elisabeth stolz Unser Scherpen trong, und Unsern Verein hams olle 3 samt unserer
Fahn würdig vertreten! Berrig! Unser Vorstand, da Christian war a middabei, und mia
wünschen am Prinz von Lobkowitz no fui Gsundheit, Freid und a langs Lem, mim
Segen vo unserm liabn Herrgott!
Herbstfest Trachtensonntag 07.09.2025
As Rosenheimer Herbstfest hod wieder ois zwoate, fünfte Jahreszeit de Leid erfreut.
Zum Blasmusik- und Trachtlersonntag im Flötzinger Festzelt is wieder a ganzer Bus,
vo da Stacheder Moni organisiert worn, und viele Edelweißer Trachtler ham sie an da
scheena Musi, de Goasslschnoiza und da Amboßpolka erfreut. Der gemeinsame
Plattler, wo des ganze Zelt hupft, is da ungeschlagene Höhepunkt vo dem ganzen
Aufdnochd. Schee dass ma dabei warn!
Ludmilla Bergbauer + 15.09.2025
Am 15 September 2025 ist unser passives Mitglied, de Ludmilla Bergbauer
verstorben. Sie war de Frau vom langjährigen Musimoasda vo da Oablinger
Stodtkappein, de a oft fia unsern Verein gspuid ham. Mia wünschen ihr ewigen
Frieden im Himme drom.
Reinhard Landkammer, Ehrenmitglied + 18.09.2025
Da Herrgott hod a unseren Freund und Ehrenmitglied, an Reinhard Landkammer am
18. September zu sich gerufen. Lange Zeit ois Kassier im Verein aktiv und a fleissig
beim Vereinsausflug und Vereinsabenden aktiv hinterlässt er a Lücke, de ma
versuacha meng, mid Dankbarkeit und gutem Gedenken zu füllen. Unser Verein,
ogführt vo unserer Fahn, hod eam auf seim Letzten irdischen Weg geleit gem. Lieber
Reinhard, Mia wünschen dia a seelige Ruhe und dasd mid Freid auf dein Verein
obaschausd.
Es san a übers Jahr oiwei a Hauffa Ausschussitzungen. Unser Ehrenvorstand, da
Konrad Gartmeier, hod uns bei Oana sitzung beehrt, und wuid einfach moi wissen
wos so los is, bei seine Edelweißer. Des hod uns narresch gfreid!
Aktivenausflug St. Johann 20.09.2025
Unsere fleissigen Aktiven ham heia im September an extrigen Aktivenausflug fia oan
Dog gmachd. De Reise is ans Knedlfest noch St. Johann ganga, und es war a
berriger Ausflug! Da ganz harte Kern is noch am ganzen Dog Aktivenausflug no anńs
Weinfest noch Gäding gfahrn und ham das Tanzbeim geschwungen. Des is Einsatz!
Hochzeit Elisabeth und Bernhard Seidl 27.09.2025
Am 27. September ham sie Unser Miadadirndl de Elisabeth Seidl geborene Nitsch
und Ihra Mo da Bernhard as Ja Wort in da Wallfahrtskirch in Weihenlinden gem. De
Feier in Kematen war so familiär und herzlich, dass grod a oanzige Freid war der
ganze Dog. Unser Verein is mid eiglon gwen, und de Jungaktiven und Aktiven ham
an Ehrdanz gmachd. Fui Aktive Plattler warn privat auf da Hochzeit und wia as
Vereinsliad gsunga worn is, wars a bsundas erhebender Moment. Da Christian hod
im Nama vom Verein a Kreiz hergschenkt, des Unser Elisabeth mid Ihram Berni und
eanana Anna-Lena in eanam neien Dahoam in Hegling beschützen soid. Liebe
Elisabeth, mia wünschen dir auf deim weiteren Weg alles gute und Gottes reichen
Segen fia di und die ganze kloane Familie!
Trachtenjahrtag 28.09.2025
Am 28.9. war Trachtenjahrdog vo de Zwoa Oablinger Vereine, den heia mia
Edelweißer organisiert ham. Beim Abmarsch um 9:45 san ma gschneitst und kamped
vom Heimatmuseum and Maria Himmefahrtskirch marschiert. Unter den Klängen der
Derder Musi, de uns mid unserm Diplomkirchenmusiker, am Konrad Liebscher
zammgspuid ham is de Kirch gestaltet worn. Danoch hod de Derder Musi beim Wirt
vo Miadakin zum Frühschoppen aufgspuid. Erstmalig in kleinerer Besetzung. Es war
a unterhaltsame, nette Runden wo ma ned nur Musi hean, sondern a guad ratschn
hod kinna.
Kneifel Bernhard +28.09.2025
Am 28. Sptember is da Kneifel Bernhard ois passives Mitglied eigschlaffa und hod
sein Weg in de Ewigkeit angetreten. Bernhard, mia danken dia fia dei Treue zum
Verein. Lieber Bernhard, Ruhe in Frieden.
De Silberhochzeit vo da Riadl Christine und Ihram Franz war am 30. September.
Zum Gratulieren war da Matschgo, Markus Martin und de Merk Beawe dort, wo sie
zu zwoat so laut wia 10e unser Vereinsliad mid de besten Wünsche überbrochd ham.
Karl Barbara (Wegmacher) + 01.10.2025
Am 1. Oktober is de Karl Barbara vom Wegmacher Hof vo Miadakin verstorben. Sie
war aktives Mitglied vo Unserm Verein. Liebe Barbara, mia denkan an di, und gfrein
uns, dasd bei uns dabei warsd, und jetzt dein ewigen Frieden beim Herrgott finden
hosd kinna.
In dera Woch vom Trachtenjahrdog, is unser Fahn 6 moi fia Unsern Verein ausgruckt.
Da Schweiger Jakob war do grod in da Schui, aber olle ham guad zammghoiffa, so
dass Sie immer an starken Arm gfundn hod, der Sie drong hod.
Unser Fahn is ned nur bei scheene und traurige Anlässe vo unserm Verein dabei,
sondern a bei Beerdigungen von Ehrenmitglieder unserer Paten-und Brudervereine.
So war sie a bei da Beerdigung vom Herrn Stigloher, und am Herrn Fischer ois
Ehrenmitglieder vo de Oberlandler dabei. A Dank an olle Fähnriche und Begleiter, de
kurzfristig eigsprunga san, und de, de sunsd immer do san.
Jungaktivenausflug Hütte 02.10.2025
Unsere Jungaktiven ham ois Abschluss vo eanana Gruppen no an Hüttenausflug
gmachd, bevor sie zu de Aktiven dazuakemman. Mia wünschen eich a super
scheene Aktivenzeit mit fui Lacha und Danzen und Freindschaften fias Lem!
Vereinsabend in Miadakin 03.10.2025
Am Tag der Deutschen Einheit war Vereinsabend beim Wirt vo Miadakin im Saal.
Unser Jugendgruppen is auftreten und da Spitzl Thomas hod uns a berrige Musi
aufgspuid. Wos uns bsundas gfreid, is, dass ma an hauffa Neuaufnahmen
verzeichnen ham deaffa. Da Herl Korbinian, und de Schweiger Bernadette ham sie
aufnehma lossn. De Bernadette hod an dem Dog sogar ihran 16. Geburtstag gfeiert.
Und olle Trachtler im Soi warn dabei. Is des ned schee!
Vereinsausflug noch Beilngries 11. - 12.10.2025
Vereinsausflug der Edelweißer- Die Oablinger in Beilngries
Olle Mitfahrer ham sie pünktlich zur Abfahrt versammelt, wobei de Aktiven no fui
Vorfreude vom Weinfest vo Heharoa am Dog davor midbrochd ham. Die Fahrt ins
Altmühltal beginnt wia immer mid Brezen und Kaffee und wird dann mit anderen
Getränken und Leckereien fortgführt. Laut Marinus, dessen ausführlicher Bericht
übrigens auf unserer Internetseiten zum lesen is, is de Schätzfrage vo da Moni heia
überraschend früh gestellt worn. A Glasl voller Guatl. Wia fui meng des woi sei? In
Beilngrias an am scheena Markt angekommen san Unsere Trachtler auf an Ziacherer
und an Posaunisten droffa und de ham dann glei midnand Musi gmachd, und unsere
Buam an Marschplattler drauf. Aufn Kirchplatz wird dann no as Muihradl mid olle
aufgführt, wos fia große Bewunderung der Beilngrieser Bevölkerung beidrong hod.
Noch na interesannten und schauspielerischen Stadtführung hod sie de Reisegruppe
im Hotel Schattenhofer Hof zum Vereinsabend eingefunden. Zu dera Zeit san a
nummoi a bar „Vereinsausflug-Nachzügler“ hinzugestoßen. In da Wirtschaft is dann
nummoi as Muihradl danzt worn, und sogar de dortigen Bedienunga ham middoh.
Aufdnochd wird no in a Karaokebar ganga und einige san erst in de frühen
morgenstunden in eana Kammerl gschloffa. Am naxtn Dog in da Frauih steht da
Kirchgang in da Kirche Waldburga o, wo danoch no in de Rosenburg gfahrn worn is,
wos a Falknerei ogschaud ham. Noch na bestaunenden Greifvogelschau mid Adler,
Geier und Foikn, Bei da Heimfahrt is de Schätzfrage aufglöst, und da Kochwirt Mike
ois ungeschlagener Sieger auserkoren worn. In dem Glasl warn 178 Guadl drin und
da Mike war mid 176e am oller nachstn dro! Mia bedanken uns ganz herzlich bei da
Stacheder Moni fias organisieren, weil des so wos bsundas und scheens is, wenn vo
jung bis oid jeder auf da Achs is und sie auf a scheens gemeinsams Wochenende
gfreid!
Gaujugendpreisplatteln und Gauherbstversammlung 12.-15.10.2025
Am 12.10.2025 war ma beim Gaujugendpreisplatteln vertreten und fünf Dog spada
war de Gauherbstversammlung im Happinger Hof in Happing glei nebam Happinger
Au See… do war ma a dabei. Unser 1. Vorstand da Weigl Christian, de Nitsch
Christina und da Stacheder Bäda jun. warn dabei und ham unsern Verein vertreten.
Gruppenleiterkurs
A unser umfangreiche Kinder-und Jugendarbeit braucht Wissen und Lerna, und so
san de Baumann Ida, de Nitsch Maria, da Kilian und da Jakob, sowia da Strauß
Valentin, de Niedermeier Eva, de Gartner Franziska und da Niedermeier Christian zu
da Gruppenleiterschulung gfahrn. Des is wichtig, damit ma wieder fui gnua Leid ham,
de befugt san a Gruppe ozumleiten.
Dankscheen fia Eichan Einsatz fia Unsern Nachwuchs! De Ida hod nebenbei no
fleissig Sockerl gstrickt., fia den bevorstehenden Winter!
18-ner Kirta 24.10.2025
Beim Wirt in Miadakin ham a heia wieda, de 18 Trachtenvereine vom Oidlandkreis
Oabling zum Danz eiglon. Mid da 84er Musi is boarisch aufdanzt worn und de
Veranstaltung war sehr guad besucht. 3 Disch vo de Edelweißer mid Aktive,
Jungaktive und Mitglieder vom Verein warn dabei. Da Nitsch Jakob und da Kilian
warn leider a bissl ogschlong, wiss ma aus da seriösen Quelle unserer Niedermaier
Eva. Es war a berriger Obend und unser Verein is guad vertreten worn.
Es is November. In da Sunn herrlich warm, und an de Schoneckan geht da Reif scho
nimma weg. De Hirtenproben fias Adventssinga in Oabling san scho fest am laffa
und as heilige Paar und de Hirtenkinder wern a heia wieder vo de Edelweißer
Trachtler gspuid.
D Wiehnachtsfeier vo de Trachtler wird a scho hergricht und aufdnochd riachts scho
a bissl noch Winter.
Zur Zeit laft a Petition über de Programmgestaltung vom Boarischen Fernsehn, weil
de Präsenz vo Bayrischem Brauchtum und Volksmusik immer weniger wird. Des is
schod, weil des a a Stickal Hoamat is, des verloren geht.
Der sonnige Herbst hod uns a, a bsundas guads Erntejahr fiad Kartoffeln brochd.
Seit 25 Jahr wars nimma so fui. Und des warn heia in Deutschland 13,4 Millionen
Tonnen.
Der Kriag zwischen Russland und da Ukraine is immer no und es wirkt scho fast
normal, wenn ma davo ließt. Erschreckend wia ma do obstumpft, wenns nur lang
gnua dauert, oiso so geht’s mia zumindest. I hoff, dass ma ned aufhean, wachsam
zum sei, und den Glauben an des Guade ned zum verliern.
I mechd mi no ganz herzlich bei olle bedanken, de midghoiffa ham bei de
Informationen fia de Chronik, weil i des sunsd, vo so weid weg gar ned so gnau
macha kunnd.
I wünsch eich an scheen Herbstausklang, an scheena Start ind´n Advent, und das
ma Zeit finden und uns nehma, fia de scheena Sachan auf dera Weid, und a a bissl a
Ruah.
Chronik gschriem vo da Funk Beawi in Woichnsee fia Ihrane Edelweißer in Oabling
bei scheenstem Herbstweda
GTEV Edelweiß Chronik für das Vereinsjahr 2025/ 2026 der vordere Teil
Jahreshauptversammlung 2025 am 8.11.2025
„Jahreshauptversammlung des GTEV Edelweiß Bad Aibling – Im Zeichen der
Jugendarbeit“, so iss in dem großen Zeidungsartikel im Mangfallboten gstandn. Zur
alljährlichen Hauptversammlung ham mia Edelweißer uns im Soi beim Kriechbaumer
in Miadakin versammelt. Noch dem Gedenken der Verstorbenen durch unsern 1.
Vorstand, an Weigl Christian, hob i mein Bericht vo da Chronik vorglesn. Unser 2.
Vorstand, da Stacheder Max hod an hauffa Gratulationen ghabt welche in unserm
Vereinsgruass und Liad besungen worn san. Unser Hornfuchs, da Woidleitner
Ludwig hod an wichtigen Termin in Shanghai ghabt und hod dessweng sein Amt
nicht selbst verrichten kinna. De Nitsch Brüder, da Jakob und da Kilian ham fia eam
diese Ehrenvolle Aufgabe übernommen. Sieben neue Mitglieder, davo viere aus da
Jungaktiven Plattlergruppe hod unser Verein an dem Obend aufnehma deaffa. Des
warn da Johannes Krabichler, de Rosa Matheis, de Christina Rinser, de Anna
Hundhammer, de Monika Matheis, de Lisa Niedermeier und de Petra Niedermeier.
Da Jugendgruppe is a Ehrennadel für 10-jährige Mitgliedschaft bei de Edelweißer
verliehen worden. Stolz ham de 20 Jugendlichen eana Ehrung empfangen. Vo
Februar 2015 bis November 2025 hods de Gruppen so gem und sie ham im Jahr
rund 40 Proben obghoidn…des is an Hauffa Zeig. Zu dem Anlass is de Jungaktive
mid da Aktiven Plattlergruppen zammgführt worn. Sie ham a glei midnand danzt und
plattelt wos vo tosendem Applaus bejubelt worn is. A großer Dank is de
Gruppenleiter vo dera Gruppen ausgsprocha worn. Des war da Florian Gartmeier, da
Peter Stacheder junior und de Franziska Stockinger, wo de letzten 10 Jahre mit
durch des Lem vo dene junga Leid begleitet ham. Zusätzlich is olle Betreuer oller
Gruppen gedankt worn, welche sich so zeitintensiv in die Jugendarbeit vom Verein
einbringan.
A de Musikanten, de jede Woch mit echter, handgemachter Musi die Proben
bereichern, sowia da Jugendleiterin Ida Baumann sei herzlich gedankt. Mehr als 100
Kinder finden bei den Edelweißer Trachtler Gemeinschaft und an Guten Ort um
Heimatverbundenheit, Brauchtum und Freid am danzen zu vereinen. A da Bericht
vom Kassier, Peter Stacheder junior, unserer Jugendleiterin, da Ida Baumann, und
da Zeugwartin Beawe Merk sowia vom Vorplattler Stefan Strauß junior, hod koan
Zweifel dro glossn, wia gewichtig die Jugendarbeit vom Vereins gefördert werd.
Unser 1. Vorstand, da Weigl Christian, hod an Ausblick auf die kommenden Termine
zoagt. Mit dem Spruch „Sitt und Tracht der Alten, wollen wir erhalten, aber auf dem
alten Grund, weiterbauen zu jeder Stund“ hod da Christian de Veranstaltung
beschlossen. In der Kinder- und Jugendförderung vo uns Edelweißern, werd
„weitergebaut zu jeder Stund“, sodass a Beitrag gleist wern konn, de Kinder und
Jugendlichen ois gefestigte Persönlichkeiten ins Erwachsenenleben zu begleiten.
Volkstrauertag am 16.11.2025
A Woch noch unserer Jahreshauptversammlung is Unser Fahnenabordnung beim
Volkstrauertag in Oabling mid dabei gwesn.
Mia bedanken uns ganz herzlich für de Träue zum Verein, vo unserm Mitglied, da
Hannelore Troffer, de am 25.November 2025 Fia immer eigschlaffa is.
Der Herr gebe ihr die Ewige Ruhe und das ewige Licht leuchte Ihr.
27.11.2025 Abschlussgottesdienst
Ende November war wieder da Abschlussgottesdienst vo Unsere Kinder- und
Jugendgruppen, sowia de Aktiven, in da Kirch in Miadakin. Anschließend hods
Lebkuacha und Kinderpunsch im Gmoaheisl gem, wos a scheens End fia des
Probenjahr war.
Kurz drauf hod a Treffan mid olle unsere Gruppenleiter stattgfundn. Do is unter
anderem besprocha worn, wos des naxte Jahr so ohsteht, und wias gmachd wird. A
scheene Sach, dass sie unsere Gruppenleiter so obedean! Dankscheen fia eichan
Einsatz!
Am 14.12.2025 Adventssingen im Kurhaus
Weiter hod im Dezember a wieder as Adventssinga im Kurhaus in Oabling
stattgefunden. Unter der Leitung vo da Merk Beawi und mid de Texte vom Keller Toni
ham an hauffa Mitwirkenden, aa aus de Reihen vo unserm Trachtenverein, aufd´
Advents- und Weihnachtszeit eigstimmt.
Zum Geburtstagfeiern warn mia bei unserm Ehrenmitglied, am Schenkel Kurt eiglon.
Beim Wirt vo Dred hod er im Kreis seiner Familie gfeiert und mit unserm Vereinsliad
ham mia eam zum 80. Geburtstag gratuliert. Des war am 17.12.2025.
6 Dog spada (am 23.12.2025) ham ma glei nummoi gratulieren deaffa und warn bei
da Hartmann Rita um sie zum 85. Geburtstag zu beglückwünschen. Mid na klaona
Abordnung ham ma unserm Ehrenmitglied gratuliert, und as Vereinsliad gsunga.
Gfeiert hod sie dahoam mid Familie, Enkel und Urenkel.
Mia wünschen unsere zwoa Jubilaren olles Guade, Gesundheit, Gottes Segen und
song nummoi Vergelt´s Gott fia Eicha dabeisei beim Verein und de vielen Dienste, de
ihr a beide ois Kassier für uns Edelweißer geleistet habz. Dankschen!!
Am 20.12.2025 is Weihnachtsfeier
Unser Weihnachtsfeier beim Kriechbaumerwirt vo Miadakin war, wia jeds Jahr sehr
guad bsuacht. An hauffa Kinder und Erwachsene wuseln durch´n Saal und werdn
durchn staadn Teil auf de sanfte staade Zeit vor Weihnachten eigstimmt. Organisiert
is der desmoi vo de Geschista Merk worn. Noch Klarinettnmusi, Bläserintrade, Ziach
und Weihnachtsverserl sowia am Kinderchor, ham ma mid dem gemeinsamen Liadl:
„es wird scho glei dumpa“ an staadn Teil beendet. De Strauß Marianne hod am
Kinderchor mid einige Mädels aus da Aktiven Gruppen a no a Nikolausliad beibrocht,
mid dem sie den heiligen Mo im Sooi begrüßt ham. Des war der „Übernahmeauftritt“,
weil ab da Maiandacht, de uns jetzt boid bevorsteht de Rinser Christina, de Britzl
Hannah und de Schweiger Bernadette den Kinderchor ganz übernehman.
Dankscheen da Marianne und de Mädels fia eanan Einsatz. An Nikolaus hod fia uns
heia da Matschgo (Markus Martin) gmacht. Einige Engerl ham eam Gschichten
zuadrong, wos so loswar übers Jahr, bei de Edelweißer. Dankscheen do dafia.
Anschließend versammeln sie de Kinder scho olle vorn vor da Bühne aufn Bon, und
jeder mecht an guadn Platz ham, wenn des extra eistudierte Theaterstikkl „zfui Geld
is a nix“ aufgführt werd. Unter da Regie vo da Baumann Paula, de leider an da
Aufführung krank war, ham unsere sauguadn Schauspieler a berrigs Theater
obgliefert, wos mid tosendem Applaus gewürdigt worn is. De Herzen vo jung und oid
head ma glei heha schlong, wenn de ersten Lose fiad´Tombola ausgeteilt und
verkafft wern. Do deaf ma uns ganz herzlich bei da Stacheder Moni und am ganzen
Ausschuss für Feste und Feiern bedanken, de olle zammheiffan, das ma scheene
Gewinne ham. A bei olle de bei de Gschäfta frong um a Spende und olle de wo wos
gespendet ham a Herzlichs Vergelts Gott. Dankscheen a de fleißigen Helfer unter da
Nitsch Johanna fias aufbaun und ausgem am Tombola-Stand. So fui Vorbereitung fia
oan Obend und so fui Freid in de Aung vo kloa und Groß noch na gelungenen
Weihnachtsfeier, zoagt uns, dass sie der Aufwand vom Proben und Herrichten
ollomoi lohnt. So a familiäre und harmonische Veranstaltung gibz selten, und fia mi
zumindest is der Obend a Stikkal Weihnachten.
Zum Krönungsball im Kurhaus lodt de Faschingsgilde Bad Aibling ei und da Schlier
Stephan hod am neien Prinzenpaar würdevoll an Schlüssel der Stadt fia de
Faschingszeit überreicht. Voller Stolz ham ma sei deaffa, dass da Prinz Marinus der
2. Aus de Reihen unserer aktiven Gruppen und der im Verein sehr engagierten
Familie Halbig kimmt. A fui vo unsere Aktiven san bei da Garde mit dabei und dean
sie im Vereinsleben der Gilde Oabling engagieren. Des bassd agratt, weil bei de
Trachtler eh weniger los is in dera Zeit und ned das fia den oan oder andern no a
„Tanzlücke“ entsteh dad. So ham sie olle danzt wos as Zeig hoid, und da Tanzlehrer
vom Prinzenpaar hod sie sakrisch gfreid, dass da Marinus scho so a qualifizierte
Tanzgrundausstattung midbrochd hod. Es is uns a a Ehre! Oabling Glore!!
Am 18.01.2026 ham ma unsern Vereinsabend im Johannisbod in Oabling
abgehalten. Es war uns a Freid in dera oidn Oablinger Wirtschaft zu Gast sei zum
deaffa. San mia doch an Fronleichnam oiwei bei de Weisswirscht im scheena Gartn
vom Johannisbod. An Matschgo (Markus Martin) sei legendäres Bayernräzel hod sie
an dem Obend um bayrische Berühmtheiten und Persönlichkeiten draht. An 1. Platz
des Bayernräzeltrepperls hod de Nitsch Christina, an 2. Platz, da Onkl Xav
(Gartmeier) und an 3. Platz da Niedermaier Christian gmacht. Olle san natürlich an
dem Obend Sieger der Bayernherzen und a herzlicher Dank guidt olle, de kemma
san, und am Matschgo (Markus Martin) fia de berrigen Ideen, de Umsetzung und as
dabeibleim vom Bayernräzel vo de Oablinga Edelweißer. Wer hod des scho.?
In Miadakin beim Wirt find, wia jeds Jahr wieder as 18-ner Trachtler- Treffen vo de 18
Trachtenvereine vom Oidlandkreises Bad Aibling statt. Es is a scheena Austausch,
und froh kenn ma sei, dass ma so an Wirt ham und de Möglichkeit fia soichane
Veranstaltungen überhaupt gegeben is. Dankscheen.
De 18-ner Versammlung hod Anfang Februar in Osterminga im Nigelnogelneien
Vereinsheim stattgfundn. Des mim Trachtenhaus war a großes Vorhaben und mia
wünschen de Ostermünchner Trachtler fui Freid damit. Da Weigl Christian und da
Eichner Johannes ham unseren Verein bei da Versammlung vertreten.
Unser Ehrenvorstand, da Gartmeier Konrad hod am 06.02.2026 sein 85. Geburtstag
feiern kinna. Zum Weisswurschtessen aufn oidn Ziaglerhof in Oabling is eiglon worn,
und fui Gäste und Vereine ham dem Jubilar Glückwünsche übebrochd. Da Onkl
Konrad war in seim Lem sakrisch fleissig fia d Stod und fiad Vereine. Dankscheen do
dafia. A vo uns Edelweißer is a Abordnung zum gratulieren higfahrn und hod sie de
Weisswirscht schmecka lossn. Liaba Konrad mia wünschen da no olles guade!
Weil ma so a Freid am lustig sei ham, hods a wieder Faschingsplattlerproben in
unsere Großen und kloana Plattlergruppen gem. Statt´n Muihradl danzen de Kinder
an Zeidungsdanz und unsere Aktiven ham uns wieder sehr würdig am Dirndlkranzl in
Biberg vertreten, heia ois: Die Schlümpfe, (mei Naserl is so rot weil i so blau bin)
A echter Higucker!
Beim Tanzfestival vo da Faschingsgilde ham a wieder einige Mädels vo da Aktiven
Gruppe des Kinderschminken fia de Faschingsgilde Bad Aibling übernomma.
Schee dass so a midanand bei de Oablinger Vereine is.
Am 15.02.2026 is Faschingszug in Oabling gwesn, und unsere Kinder san ois
Fußgruppen mid Betreuern midganga. Sie ham des Thema vo unserer letztjährigen
Faschingshochzeit aufgriffa: Galaktische Edelweißer und Weltall. Es hod a bissl
gschneibet, war aber sunst drukka und unsere Edelweißer „Jungastronauten- und
Auserirdische“ warn warm eibaggld!
A Unser Verkaufsstand am Marienplatz war wieder gut besucht, a wenn heia scho
um 4e am Nammedog Schluss war, weils ab heia a neis Konzept fian Faschingszug
ausprobiert ham. De Gilde hod nochm Umuzug no zum Faschingstreiben in der
Viehhalle eiglon, wos soo guad ognomma worn is, das gar ned olle Leid Platz ghabt
ham, de no midfeiern wuidn. Mia mechtn uns ganz herzlich bei de vielen fleißigen
Helfer bei de Kinder und am Verkaufsstand bedanken. Es is schee das mia unsern
Verein do so präsent vertreten kinnan. Mia gfrein uns auf naxts Jahr wenn hoffentlich
wieder a Faschingshochzeit in den Reihen der Edelweißer geplant wird.
In da letzten Chronik hob i scho unsere felissigen angehenden Jugendleiter erwährt,
de den extrigen Jugendleiterkurs fia unsern Verein absolvieren. Jetzt war da 2. Teil
vo dem Kurs, der vom Inngau angeboten worn is. Vo 25 Teilnehmer, aus de
umbliegenden Vereine san mia Edelweißer mid 8 Leid vertreten gwesen. Do kenn
ma stoiz sei dass unser Kinder- und Jugendarbeit so Unterstützung findt und mia a
so an stabilen Eindruck an de andern Vereine vermitteln ham kinna. Des is wirklich
schee. In dem Kurs san wichtige Grunlagen im Umgang mid Kinder und
Jugendlichen vermittelt worn. Drunta warn Tehmen wia Gruppenpädagogik,
Prävention, Kommunikation, sowia de Planung für Ausflüge und Unternehmungen.
Außerdem san verschiedene Spiele ausprobiert worn, de ma guad in da Plattlerprob
umsetzen konn. Mid Blick aufs diesjährige Zeltlager is fui Wissen weidagem worn
und de Gruppen und de oid´n und 8 neien Gruppenleiter gfrein sie scho sakrisch
drauf.
Den Kurs ham gmacht:
Ida Baumann, Jakob Nitsch, Maria Nitsch, Kilian Nitsch, Franzi Garther, Eva
Niedermeier, Valentin Strauß und Christian Niedermeier.
Zusätzlich zum Jugendleiterkurs werd no, vo de neien Gruppenleiter a Erste Hilfe
Kurs beim Bayrischen Roten Kreiz gmachd, wos da Kreisjugendring komplett
finanziert.
Danke fia Eicha Entscheidung, unsern Verein auf de Weise zum Unterstützen und
Danke an olle, de des scho so lang machan. Do san ma a Schau!
Am Dienstag noch Boimsonntag war as Jubiläumskonzert vo da Dreder Musi, de
heia 80 Jahre Musispuin feiern deaf. De Dreder Musi hod sie in de schwaarn Zeiten
nochm Kriag gegründet, woós de Leid ned bsundas guad ganga is. Drei junge Kerl
ham domois beschlossen wieda Freid, Fröhlichkeit und Lustig sei unter d Leid zum
bringa. Und so hams dann zum Musi spuin ogfangt. A heid no schenkt uns de Dreder
Musi fui Fröhlichkit und a scheene, aber a würdevolle Musi. So begeleiten sie uns bei
Festl, Auftritten, ois Marschmusi oder bei Jahrdog und Beerdigungen. Es is a
scheens midananda und hoffentlich konn des de naxten 80 Jahr so weida geh!
Mia gratulieren und bedanken uns recht herzlich und wünschen da Dreder Musi
weiterhin de gleiche Freid am lustig sei und Musi macha!
Osterkerzen Am 01.04.2026 Vereinsheim
A des Jahr ham wieder rund 20 Kinder voller Eifer Osterkerzen im Gmoaheisl in
Miadakin verziert. Des Angebot wird vom Trachtenverein gmach und unterstützt und
angeleitet san de Kinder heia vo da Niedermeier Eva und da Nitsch Maria worn.
Vielen Dank Eich do dafi. Fui Mühe und Ehrgeiz ham de Kinder in eanane kloana
Kunstwerke gsteckt und ois Abschluss hod jeds Kind a bissl a Schokolad vom
Osterhosen Griagt. Dankscheen fia des Angebot und a Dankscheen a
and´Bossmann Edtih, d´Weigl Hildegard und d Johanna dass es des de letzen Jahre
so aufrecht erhoidn habz. Vielen Dank!
Erstmalig ham unsere Gruppenleiter zu am Elternabend fia de
Plattlerprobenkindereltern eiglon. Unser Jugendleiterin, de Ida Baumann hod durch
den Abend geführt und es warn knappe 40 Eltern vertreten. Es hod Einblicke über
Jugendarbeit, Investitionen, Wünsche und anstehende Termine gem. Schee, dass
des vo Seitens der Eltern so guad ognomma worn is, und dass unsere Betreuer und
Jugendleiter des Angebot gmacht ham. Dankscheen do dafia!
Am 18.04.2026 hod da 1. Kleidertausch im Vereinsheim stattgfundn. De Aktive und
de Jugendgruppn ham Gwand hergem oder ghoid und d´Mama, de Merk Beawe
(sen.) ois Zeugwartin mid ihra Tochter da Rosalie ham olles hergricht und getauscht.
Erstmalig is a „Kleidertauschstange“ ins Lem gruaffa worn, wo Trachtengwand vo
jedem verschenkt wern konn. Wenns wer braucht nimmt ers mit und des wos ned
braucht wird griagt der zrukk, dem wos ghead hod. Des Angebot is sehr dankend
angenommen worn und es ham einige Kleidungsstücke an neien Besitzer gfundn.
Mia san sehr stolz, dass unser Verein de Kinder de Möglichkeit gem konn, ois fesche
Trachtlerkinder unser Tracht zum dron, egal wia guad oder schlecht de Eltern
finanziell aufgsteid san. As Lem werd oiwei no teiriger und durch de Tauschtage kenn
ma heiffa, dass ned am Geld scheitert, dass oana koa Edelweißer Trachtler wern
konn.
Des is brutal schee!
Bei der großen Kindergruppe gibz grod a große Differenz zwischen de 18 Buam und
7 Dirndl. Oft iss andersrum. Vielleicht finden ja no a bar Dirndl an Weg zu uns, damits
wieder ausgeglichener is. Fui Glück und gutes Durchhalten de Gruppenleiter mid de
hauffa unbeschäftigten Buam unter da Prob.
Heid unterm Dog is da 2. Kleidertausch gwesn. De 2 Kindergruppen wern ausstaffiert
und desmoi heift zu da Merk Beawe und da Rosalie no de Weigl Beawi fleissig mid.
Gfrein ma uns auf fui Anlässe, wo ma uns über unsern eigwandtn Nachwuchs gfrein
kinann!
Zu am Ehrenamtsempfang vo da CSU san olle Ortsvereine ins Kurhaus eiglon worn.
Unser Innenminister Herrmann hat sich die Ehre gegeben und es is Raum für
Themen der Vereine gschaffa worn, de durch eanane Vertreter darbrocht worn san.
De Veranstaltung hod a große Wertschätzung fürs Ehrenamt zoagt, und Unser
Vorstand da Christian Weigl is mim Matschgo (Markus Martin) und unserm
Bürgermeister am Schlier Stephan dort vertreten gwesn.
Bei de Kommunalwahlen in Oabling is des Ergebnis ned eindeutig gwesn und so isśs
auf a Stichwahl ausseglaffa. Ab 01.Mai 2026 hod unser Stod Oabling a neie
Bürgermoasdarin, de Frau Kirsten Hieble-Fritz. Sie hod knapp gegan bisherigen
Bürgermeister, unser Mitglied an Stephan Schlier gwunna. Mia mechtn da Frau
Hieble- Fritz a guade Hand für die Geschicke vo da Stod wünschen und hoffan, dass
sie a so a Herz für die Ortsvereine hod, wia da Stephan. Beim Stephan mecht ma
uns ganz herzlich bedanken, dass er so aufd Vereine und auf uns Trachtler gschaud
hod, und fia sei stets offenes Ohr. Mia wünschen dir und deiner Familie olles guade
und da Frau Hieble- Fritz an guadn Start.
In Bayern geht da Frühling auf und überoi bliahts und summts scho. In Oalbing in da
Inennstod is no oiwei de große Baustelle beim ehemaligen Sebastiani, auf da Welt
geht’s no imma sauba zua und übers Jahr san an hauffa Ausschussitzungen
obghoidn worn. Do mecht i unserer Schriftführerin da Marina Mayr und olle
Ausschussmitglieder no a herzlichs Vergelt´s Gott song. Unsere Aktiven san durch
de Zusammenlegung vo de Gruppen so stark und machan a sakrisch scheens Buidl.
I wünsch eich, dass ois Gruppen guad zammawachstu und a Freid habz, wennz
midnand danzn deafz.
Und jetz is Frühjahrsversammlung beim Kriechbaumer in Miadakin. I gfrei mi, dass
ma do sei kinnan und beinandasan.
Chronik gschriem vo da Funk Beawi am Woichnsee fia meine Edelweißer in Oabling